آه يا بلد كل حاجه وعكسها…

0 27

أسامه أبو العنين

اخبار مشابهة
1 من 50

ما بقتش أتفاءل بأي تصريح يخرج علينا إن في إكتفاء من شيء معين، أو إكتشاف جديد،
لأن اللي بنشوفه بعد كدا العكس تمامآ،
يعني لما قالوا خلاص الكهرباء بقت تمام، وأزمتها اتحلت، ومبقتش تقطع زي زمان،
لا مش كدا وبس،
لا بقي عندنا كمان إكتفاء ذاتي من إنتاج المحطات وهنصدر كمان،
ابسط يا عم، يعني هنصدر كهربا،
يعني تصدير وعمله صعبه داخله البلد، والدنيا هتبقي تمام، وأكيد مش هينسونا من الخير دا طبعآ، يعني أقل ما فيها فواتير الكهرباء هترخص والدنيا هتبقي تمام،
لكن العكس هو اللي حصل،
زيادات في فواتير الكهرباء تقطم وسط أجدع رب أسرة،
قلنا ازاي دا احنا بنصدر كهرباء،
قالك هتدفع ولا نفصل الكهرباء،
لا لا هندفع طبعآ،
وقلنا مش مهم أكيد هما اللي فاهمين، هو احنا هنفهم أكتر من الحكومه،
#شوية كدا وقالك إلحق يا جدع لقينا غاز هينغنغنا فلوس، وكمان حقل (ظهر ) دا إيه كنز إيه،
ما أقولكش
البلية هتلعب والشعب هيروق على نفسه،
قلنا يافرج الله،
ماهو احنا صبرنا كتير وتعبنا من شد الحزام، ودا عوض ربنا للشعب الغلبان،
لكن إيه اللي يحصل بقى،
اللي حصل ما يتوصفش، زيادات رهيبة في فواتير الغاز،
إزاي يا جدع،
دا احنا اكتشفنا غاز يغنينا طول العمر،
المفروض الغاز يرخص، يعني بدل ما توزعوا علينا فلوس، تزودوا الفواتير، إزاي يا عم،
هتدفع ولا نفصلوا الغاز،
لا لا هندفع طبعآ،
هو احنا هنفهم أكتر من الحكومة،
شوية كدا وقالوا حاسب يا جدع،
مزارع سمك،
والسمك هيبقى ببلاش،
وهنصدر كمان،
دا احنا عندنا مزرعة (غليون) اكبر مزرعة سمكيه، حاجه كدا ما أقولكش يعني،
يعني هنبيع ونصدر والناس هتاكل أحلي سمك وببلاش،
وبرضه نصحى نلاقي السمك بقى سعره في السما،
طيب ازاى، دا احنا عندنا نيل عظيم، وبحور بكل الألوان، بحر ابيض وبحر احمر، وبحيرات كمان،
ليه السمك اللي كان اكل الغلبان سعره يبقى في السما وبدون استئذان،
هو فيه ايه ياعم،
هو كله ضرب ضرب مفيش شتيمة،
مش عارف أقول إيه،
هم يضحك وهم يبكي،
بس همنا ما بقاش يبكي بس،
دا بقى يقهر،
زيادات رهيبة في كل السلع، وتدني مريع في الأجور، وغياب الرقابة، وبقى كل واحد ماشي بيعمل اللي هو عاوزه في خلق الله،
انعدم الضمير، وماتت الرحمة من قلوب العباد،
يارب سلمنا من كل شر، وارفق بحالنا يارب العالمين،
#عرفتوا بقي إنها ماشية كل حاجه وعكسها…

اترك رد