جوه الدولاب حاجات كتير وشماعات
وكل حاجه في الدولاب لها ذكريات
كراكيب قديمه من زمن وعمر فات
يمكن يكون مالهاش تمن ف الأمنيات
لكنها أصل الحكاية
أجمل رواية
هي البداية
والباقي كله سناريوهات
طلعت ألبوم الصور والتابلهوات
لاقيت جِمال وأرض صفرا
وأهرامات
وناس كتير متصورين
جنب المعابد
ويا الأثار
جوه الحارات والباترينات
وصورة تانية في الحسين والسيده
وناس كتير متجمعين ساعة الندا
آدان بيدن يشد كل الأفئدة
وصورة للنيل الأصيل شاهد تاريخنا ومجدنا
وفلاحين مشمرين واقفين فوسط أرضنا
فاسهم سلاح
قصة كفاح
مالفجر ولغاية الغروب
لأجل اما ناكل كلنا
والصيادين
جوه المراكب شقيانين
رامين شباكهم عشمانين
ف رزق مقسوم مالسما
عمال مصانع مطحونين
وسط المكن
ومفرومين بين التروس
عايشين حياتهم ملحمه
وصورة للسكة الحديد
وألف ايد
متشبكين مع بعضهم
وطريق جديد بيتفتح
علشان يوفر وقتنا
علشان يسطر مجدنا
شقوا طريقنا بالعرق
و كملولنا ملحمه
وصور للحرس القديم بعد أما حرر أرضنا
وحطم بإيدينه الغرور
ساعة العبور
داس بالبياده أعلي سور
نال الشهاده ف الطابور
لكنه حقق أمننا
وصوره فيها أساتاذتي ف المدرسة
واحنا تلامذه صغيرين
مبدأنا دين
وبعده علم وهندسه
رافعين علمنا ف الطابور
و ف كل حصة موجودين
حافظين أدبنا وعلمنا
ياريت تكون الأمنيات
زي اللي فات
ونرجع العمر الجميل
لحضن قلب مصرنا
ونرجع العمر الجميل
لحضن قلب مصرنا
اخبار مشابهة
